बुध कुँवार १२ , १२ आश्विन २०७९, बुधबार| थारु संम्बत:२६४५

धानबालीहे किरासे बचाइक लाग हरेरी पूजा

धानबालीहे किरासे बचाइक लाग हरेरी पूजा

शत प्रतिशत कृषि पेशामे आधारित थारु समुदाय कौन बेलामे कौन बाली हुइथ, कैसिन ठाउँमे कैसिक बाली लगाइ परथ कना बात पत्ता रहठिन । कौन बालीमे कैसिन रोग लागथ ओ ओकर विरुवाफे कैसिक करेपरथ कना विज्ञ रहथै । ओइने अपन वालीनालीहे बचाइक लाग तमान उपाय करथै ।

मुख्य बालीके रुपमे रहल धानबालीहे किरा, रोगदोखसे बचाइक लाग थारु समुदायके किसान हरेरी पूजा करथै । पहिलेक जुगसे धानबालीहे रोगसे बचाइक तमान घरेलु विरुवा ओ हरेरी पूजा करति आइल बतैथै देश बन्धिया गुरुवा दलबहादुर दहित ।

धानबालीमे गुभिया, दाभी, फटिङगा, जलरु, गाँन्धी लगायत तमान मेरके किरा लागके धानके बोटहे नष्ट परथै । ओस्तेक धानमे तमान जातके खैरा, पैरा ओ दहिया रोग लागथ । उ सक्कु चिजके विरुवाके लाग हरेरी पूजामे करल देश बन्धिया गुरुवा दहित बतैथै ।

हरेरी पुजामे तमान देवीदेउताके पूजा कैनाके चलनफे रहल वहाँ कहलै । जेम्ने डहरचण्डी, गौरी, सिद्धबाबा, कल्का, पाँच पण्डवा, रक्सा, झाँख्री, वनस्पति ओ पूर्वी देउताके पूजा करति रहल गुरुवा दहित बतैलै ।

धानबालीमे किराकाँटी नालागित नाकटिट कहति हरेरीक रोज खेतुवा मन्से किरा पकरके नानके पूजा करलपाछे ओइनहे खैना चलन रहल ओ अपने विगतसे खैति आइल केशौका गुरुवा लौटन चौधरी बतैलै ।

पूजापाठसंगे किरा खैलेसे किरानके दाँत कोठठा जैना तबसे किरा धानबालीहे काटे नैसेक्ना विश्वास रहल केशौका गुरुवा चौधरी कहलै ।

हरेरीक रोज गुरैपाटीसंगे अखरीया खेलजाई ओ दुध ओ धुप साजके गाउँ भरिक किसान अपन–अपन खेतुवामे छिेटे जैथै । दुध छिटलेसे रोग भग्ना ओ धुप बरलेसे किरा भग्ना जनविश्वास रहल जाँइक स्थानिय लटिराम चौधरी बतैथै ।

असारी पूजा करके हरौट लेहलपाछे खेतुवामे धान लगाके खेक्के हरेरी पूजापाछे केल घाँसकाँटे पैना चलन रहल चौधरी बतैलै ।

ओस्तेक धनगढी–५ जाइक गाउँक किसानहुक्रे ‘‘थारु समुदायके ऐतिहासिक पहिचान, संस्कृति सरक्षण करी हरेरी महोत्सब २०७१ भव्य रुपमे सफल पारी’’ कना नाराके साथ मंगरके रोज जाँई गाउँक देउथानमे हरेरी महोत्सब मनैले बातै ।

उ महोत्सबके बरका पहुना तथा धनगढी नगरपालिकाके इन्जिनियर दिजराज भट्ट नगरपालिका अइना बजेटमे थारु समुदायके पुरान कला संस्कृति जोगाइक लाग ओइनके देउथान निर्माणके लाग बजेट छुटयइना आश्वसन देलै ।

ओस्तेक थरुहट तराई पार्टी नेपालके केन्द्रीय अध्यक्ष भानुराम थारु देउथान निर्माणके लाग केन्द्रसे योजना छुटयागिल बतैलै ।

ओस्तेक कार्यक्रममे संघीय समाजबादी पार्टीके केन्द्रीय सचिव होरीलाल चौधरी, थरुहट तराई पार्टीक केन्द्रीय कोषाध्यक्ष खडक चौधरी, केन्द्रीय सदस्य मनिराम चाधैरी, नेपाली काँग्रेसके धनगढी नगरसभापति नृप ओड, सामुदायिक प्रहरी सेवा केन्द्र धनगढीके प्रमुख इन्द्रबहादुर शाह, थारु कल्याणकारिणी सभा कैलालीके सचिव माधव चौधरी, यूएनडिपीके क्षेत्रीय डइरेक्टर अर्जुन कुश्वाहा, जाँइक गाउँक पूर्व भल्मन्सा कुलविर चौधरी, हसनपुरके भल्मन्सा वेदप्रसाद चौधरी लगायत बोलुइयाहुक्रे थारु समुदायके पहिचानके धरोहरके रुपमे रहल देउथान ओ हरेरी पूजाहे बचाई पर्ना सक्कु जनेक दायित्व रहल ओ सरकारफे यम्ने ध्यान दैदेना बातमे जोड देहल रहित ।

कार्यक्रम जाँइ गाउँक भल्सन्सा अनम चौधरीक घरगोसयाईमे हुइल रहे । कार्यक्रममे सखिया, झुम्रा लगायत नाँच कैगिल रहे ।


error: Content is protected !!