मंगर चैत ०६ , ६ चैत्र २०८०, मंगलवार| थारु संम्बत:२६४७

अँट्वारीमे खैना खानपिन : एक चर्चा

अँट्वारीमे खैना खानपिन : एक चर्चा

अँट्वारीमे खैना खानपिन : एक चर्चा

अँट्वारी टिहुवार विशेष कैके थारु समुदायमे मनैठैं । यी थारु समुदायके एक संस्कृति फेन हो । यी टिहुवार प्रत्येक थारु समुदायमे मनैठैं । यी टिहुवार अस्टिम्की मानके डुसरा अँट्वारके दिन मनैठैं । यी टिहुवार अट्वारके दिन मनैलेक ओरसे यी टिहुवारके नाउँ अँट्वारी परल हु्इ । यी टिहुवारमे बिशेष कैके भिमके पुजा करठैं । यी टिहुवार महाभारतके कथासे जुरल बा । यी टिहुवारमे मेरमेरिक खानपिन बनैठैं । ओ अग्नी डेबहे चर्हाके काहार जाइठ् । ओहे कारहल खैना चिज अग्रासनके रुपमे अपन दिदी बहिनियनहे डेना चलन फेन बा । यी टिहुवारमे लावा लावा खैना परिकार बनैक लाग एक अठ्वारसे तयारी करे लगठैं । यी टिहुवारमे खैना खानपिनके बारेमे यहाँ कुछ बात चर्चा कैल बा ।

खँरिया
यी परिकार विशेष कैके अस्टिम्की ओ अँट्वारीमे बनैठैं । यी टिहुवारमे बनैना पकिार मध्ये एक हो । यी परिकार बनैक लाग टमान मेरके समान प्रयोग कैजाइठ् । जस्टे पैन, गब्डा या लौकक् पटिया ओ भाँरा । एकर आकार लम्मा रठिस् । यी परिकारहे फेन ढिक्री उस्ने हस उस्नठैं । खँरिया बनाइक लाग सुरुमे पिठा लन्ना टब पिठामे नोन, मिर्चा, तेल, बेसार मिलाके खोब साने परठ् । सानके सेक्के गब्डा या लौकक् पटियामे लगाके पटियाके अढन डोसके पैनमे ढिक्री उस्ने हस उसन डेबो टे खरिया बनजाइठ् । खँरिया उसनके एक घचि जुर कैके टब तेलमे भुट डेबो टे खैना लायक बनजाइठ् । यी खँरिया जब टब फेन उसनके खाइसेक्जाठ् । टे विशेष कैके टिर टिहुवार ढेर बनैठैं ।

केराउक् गुडा
यी परिकार फेन टिहुवारमे पकैना परिकार मध्ये एक हो । यी परिकार फेन पुजापाठके लाग प्रयोग कैजाइठ् । यी परिकार माघ टिहुवारमे किल नैपुज्ठंै । ओरे सक्कु टिहुवारमे केराउक् गुडा प्रयोग हुइठ् । यी परिकार टिहुवारके किल नैपकाके जब टब फेन पकाके खाइसेक्जाठ् ।

पुइँक साग
यी फेन टिहुवारमे पकैना परिकार मध्ये एक हो । यी टिना फेन पुजापाठके लाग प्रयोग कैजाइठ् । यी टिना टिहुवारमे किल नैपकाके जबटब फेन खाइसेक्जाठ् । विशेष कैके यी परिकार अष्टिम्की ओ अट्वारीमे बनैना करठैं । यी टिना सक्कु जाहनके घर मिलठ् । यी टिनाहे टुरके पनाके सफा पानीले ढोके नोन, मिर्चा, तेल, बेसार डारके आगीमे पकाइ डारडेउ । १५–२० मिनेटमे पाक्जाइठ् ओ खाइक लाग तयार हुइजाइठ् ।

गबडा
यी फेन टर टिहुवारमे पकैना परिकार मध्ये एक हो । यी टिना फेन पुजापाठके लाग प्रयोग कैजाइठ् । यी परिकार विशेष कैके अष्टिम्की ओ अट्वारीमे बनैठैं । गबडाके खरिया फेन बनाइ सेक्जाइठ् । यी माटीमे उइर्ना जात हो । एकर पटिया टर टिहुवारमे प्रयोग करठैं । यी सक्कु ठाउँमे पाइसेक्जाइठ् । यी टिनाहे टुरके टुरके पनाके सफा पानीले ढोके नोन, मिर्चा, तेल, बेसार डारके आगीमे पकाइ डारडेउ । २५–३० मिनेटमे पाक्जाइठ् । ओ खाइक लाग तयार हुइजाठ् ।

सिढरा्र टिना
यी टिनाहे फेन टिहुवारके पकैना परिकार मध्ये एक मान जाइठ् । यी टिनाहे फेन पुजापाठके लाग प्रयोग कैजाइठ् । टिना पानीमे मिलना चिज हुइटँ । टापी, ढरिया, खोंघिया या हेल्का टमान मच्छी मरना साधनले मच्छी मारके सुखैठैं । यीहे सुखाइल मच्छीहे सिढरा्र कठैं । यीहे सिढारा्रहे टर टिहुवारमे पुज्ठैं । यी सिढरा्रहे पानीले ढोके े नोन, मिर्चा, तेल, बेसार डारके आगीमे पकाइ डारडेउ । २०–२५ मिनेटमे पाक्जाइठ् । ओ खाइक लाग तयार हुइजाइठ् ।

फुलौरी
यी परिकार फेन टिहुवारमे बनैना परिकार मध्ये एक हो । यी परिकार विशेष कैके अष्टिम्की ओ अट्वारीमे बनैठैं । ओ जब खैनास लागठ् टबे फेन बनाइ सेक्जाइठ् । यी परिकार हमार पुर्खनके पालासे चलटी आइल बा । फुलौरी बनाइक लाग सुरुमे पिठा लन्ना टब पिठामे नोन, मिचा, बेसार मिलाके खोब साने परठ् । ओर फेन प्याज आलु मिलाइ सेक्जाइठ् । पिठाहे ठिक गिलगिल सानके तेलमे पकाइ डारडेउ एकघचि रहिके खैना होजाइठ् ।

खुर्मा
यी परिकार फेन टिहुवारमे बनैना परिकार मध्ये एक हो । यी परिकार विशेष कैके अष्टिम्की ओ अट्वारीमे बनैठैं । एकर आकार टिनकुने रहठ् । खुर्माहे अपन अपन तरिकासे फेन बनाइ सेक्जाइठ । कोइ चिनी डारके बनाइठ् टे कोइ बिना चिनीके साडा फेन बनैठ । यी खास कैके गहुँक् पिठाके बनैठैं । सुरुमे गहुँक पिठा खोब सानके पिठाहे नरम बनाके १० से १५ मिनेट छोपके ढारडेउ । टब पिठा नरम होजाइठ् । टबे रोटी बेलेहस बेलके चक्कुले त्रिभुज आकार बनाके काट्के तेलमे पकाइ डारडेउ । टब एकघचि पाछे खैना लायकके बनजाइठ् ।

यी टमान मेरके परिकार टमार थारु समुदायके टर टिहुवारमे बनैठैं । अइटि रहल अट्वारीमे फेन यी टमान मेरके परिकार बनैना तयारी करटी बटैं ।

अन्डिक रोटी
अन्डिक रोटी विशेष कैके अँट्वारीमे किल पकैठैं । अँट्वारीक विशेष परिकार मध्ये अन्ढिक रोटी फेन एक हो । ओरे रोटीसे ढेर अन्ढिक रोटीके महत्व ढेर बा । सुरुमे अन्ढिक पिठाहे खोब सानके एक घचि छोके ढारडेउ । टब पिठा नरम हुइ टे बेलके तेलमे पकाइ डारडेउ । एक घचि पाछे खैना लायकके बनजाइठ् । अस्टके चाउरके पिठा ओ गहुँक् पिठाके टमान मेरके टमान आकारके रोटी बनाजाइठ् ।

केरा
यी फल फेन अस्टिम्की ओ अट्वारीमे खैना परिकार मध्ये एक हो । यी फल अपने घरे फेन डवाइ डारके पकाइ सेक्जाइठ् । यी फल यी डवाइ डारके कटुटा या कौनो हावा नैझिरना बसाडीमे बहानके एक ठाउँ ढारडेउ ३–४ दिनमे पाक्जाइठ् । ओस्टके टमान मेरके फल अमरुट, खिरा ओ स्याउ यी परिकार फेन बनाइ सेक्जाइठ् ।
रविता चौधरी


error: Content is protected !!