मंगर चैत ०६ , ६ चैत्र २०८०, मंगलवार| थारु संम्बत:२६४७

रोगके नाउँ ओ उपचार विधि

रोगके नाउँ ओ उपचार विधि

रोगके नाउँ ओ उपचार विधि

हमार थारु समुदायमे टमान मेरके रोग डेखा परल बा । हमार थारु समुदायके मनै अभिन टमान अशिक्षित हुइलेक कारणसे फेन सुरक्षित हुइ नैसेक्के यी समस्या डेखा परल बा । ओमनेसे मै कुछ रोगके बारेम जानकारी कराइ जाइटुँ ।

टाइफाइड
यी रोग छोट मनैनसे लेके भारी भारी मनैनके फेन डेखा परठ । यी रोग जब मौसम परिर्वतन हुइ लागट टबे यी रोग ढेर डेखा परठ् । यी रोग फोहर पानीसे हुइल, मौसम अनुसार लुगा नैहुइलेक कारणसे फेन ओ खानपिनके कमिले फेन यी रोग लागठ् । यी रोगसे बचेक लाग सफा पानी हुइल, मौसम अनुसार लुगा लगाइ परल ओ खैनापिनामे फेन ध्यान डेहे परठ् टब यी रोगसे बचे सेक्जाइठ् ।

पिलिया रोग
यी रोग छोट लर्कासेलेके भारी भारी मनैनकेमे फेन डेखा परठ् । यी रोग रगतके कमि हुइलेक ओरसे ढेर डेखा परठ् । खानपिनमे फेन ध्यान नैडेबो टे यी रोग लागे सेकठ् । यी रोगसे बँचेक लाग रगत बह्राइक लाग भिटामिन युक्त खाना खाइ पर्ना जरुरी रहठ । विशेष कैके खानपिनमे ध्यान डेलेसे यी रोगसे बँचे सेक्जाइठ् ।

सिकलसेल रोग
यी रोग विशेष कैके थारु समुदायमे डेखाइल बा । यी रोग थारु समुदायमे सुरिक सिकार ओ मुसुक सिकार ढेर खैठंै । टबेमारे थारु जातिनमे ढेर डेखा परल बा कना मनैनके सोच बटिन । यी रोगसे बँचेक लाग खानपिनमे ध्यान डेना बहुट जरुरी बा ।

सुकेनास रोग
यी रोग छोट लर्कनमे ढेर डेखा परठ । जब बच्चा गर्भमे रठैं टबे मरल मनैनहे हेर्बो टे सुकेनास रोग लागठ कना हमार थारु समुदायमे कहाइ बा । यी रोग खानपिन ओ सरसफाइमे ध्यान नैडेबो फेन यी रोग लाग सेकठ । यी रोगसे बँचेक लाग खानपिन ओ सरसफाइमे ध्यान डेना बहुट जरुरी बा ।

गलगाँठ रोग
यी रोग फेन थारु समुदायके मनैनमे ढेर डेखा परल बा । यी रोग आइरनके कमिसे लगना रोग हो । थारु समुदायमे ढेल्की नोनके प्रयोग ढेर करलेक ओरसे यी रोग थारु समुदायके मनैनमे ढेर डेखा परल बा । यी रोगसे बँचेक लाग आयोडिन नोन प्रयोग कर्ना बहुट जरुरी बा ।

हेगनि पोकनि
यी रोग प्रत्येक गाउँ ठाउँमे डेखा परठ् । यी रोग महामारीके रुप फेन लेहठ । यी रोग छोट लर्कासे लेके भारी भारी जवान मनैन ओ बुह्राइ मनैन फेन यी रोग लागठ् । यी रोग खानपिनमे ध्यान नैडेके ओ पानीके कारणसे लागठ् । यी रोगसे बँचेक लाग ठिक मात्रामे मसला डारल टिना खाइ परठ । ढेर मसला डारल टिना नैखैइलेसे यी रोगसे बँचे सेक्जाइठ ।

सर्डि
यी रोग प्रत्येक गाउँ ठाउँमे डेखा परठ् । यी रोग महामारीके रुप फेन लेहट । यी रोग जौन उमेर समुहके मनैन फेन लागठ् । यी रोग जब मौसम परिर्वतन हुइलागठ टे यी रोग डेखा परठ् । यी रोग फोहर पानीके कारणसे फेन यी रोग लागठ् ।

टिबी
यी रोग ढेर जसिन जवान मनैन ओ बुर्हाइल अवस्थाके मनैनहे डेखा परठ् । यी रोग भिटामिन ‘ए’ के कमिसे लागठ । यी रोग लागलमे घोंघी खैइबो टे मजा हुइजाइठ कना हमार थारु समुदायके मनैनके कहाइ बा । यी रोग लगनासे बँचेक लाग भिटामिन ‘ए’ युक्त खाना खैना बहुट जरुरी बा ।

रटन्ढो
यी रोग भिटामिन ‘ए’ के कमिसे लागठ । यी रोग लागल मनैन रातके नैडेखठैं । दिनके किल डेखठैं टबे यी रोगहे रटन्ढो रोग कठैं । यी रोग जौन उमेर समुहके मनैन फेन लागठ् । यी रोग बँचेक लाग भिटामिन ‘ए’ युक्त खाना खैना बहुट जरुरी बा ।

हैजा
यी रोग महामारीके रुप लेहठ । यी रोग लर्कासेलेके भारी भारी जवान मनैन ओ बुह्राइल मनैन फेन यी रोग लागठ् । यी रोग फुहर हावा, पानी, प्रदुषित वातावरणले यी रोग लागठ । यी रोगसे बँचेक लाग सफा पानी, ओ घर गिनेरो सफा कर्ना ओ सक्कु समुदायके मनैन मिलके सफा करलेसे यी रोगसे बँचे सेक्जाइठ ।

कोरोना
यी रोग महाकारीके रुप लेहल बा । यी रोग चल्लक २ बरस हुइटा । यी रोग छोट लर्कासेलेक भारी भारी जवान मनैन ओ बुह्राइ मनैन फेन यी रोग लागठ् । यी रोग लागलमे रुघाखोंखीके लक्षण डेखा परठ् । यी रोगसे बँचेक लाग मास्कके प्रयोग कर्ना, भिरभारमे नैजैइना, सफा उमालके पानी पिना ओ खानपिनमे संगे सरसफाइमे फेन ध्यान डेना बहुट जरुरी बा ।

हमार गाउँ ठाउँमे बहुट रोग डेखा परल बा । यी रोग मध्य महामारीके रुपमे फैलल् कुछ रोगके बारेम अपन जानल बाट लिखले बटुँ । रोग टे बहुट मेरके बा । टबेमारे नैजानके फेन जानकारीके लाग लिखले बटुँ । कौनो ठाउँमे गलत हुइ टे माफ करडेबी । लावा जानकारी हुइ टे बटाके सहयोग कर्बि ।
रविता चौधरी


error: Content is protected !!