सोम्मार अगहन २० , २० मंसिर २०७८, सोमबार| थारु संम्बत:२६४४

मापन करना तरीका

मापन करना तरीका

मापन करना तरीका

पुर्खा ओइनके समयमें मापन करेक लाग टमान सर सामानके प्रयोग करैं । पहिले पहिले जब आधुनिक तरिकासे नप्ना यन्त्र नैरहिन । हमार आजा–आजी हुकरे माना, पाठी, शेर, सवइया जसिन टमान चीजसे नाप टोल करैं । पहिले हमार थारू समुदायमे किल मनैं । टमान ढेर जग्गा जमिन बनाइल रहैं । पहिलेक मनैं जमिन किनेक लाग गैया, भैसिन्या ओ जाटसे जमिनके सौडा करैं । एक मानालेफे जमिनके सौडा कर जाए । कौनोफे समानहे नाप तौल करेक लाग पहिलेक पंचायत कालमे मिलके बनाइल माना, पाठी, सेर, सवय्यासे नाप टोल करैं ।

माना
हमार थारू समुदायमे मानाके प्रयोग कैजाए । माना कलेक हमार थारू समुदायमे एक खोरियक रहिन । पहिलेक मनै एक खोरिया चाउर लैके जग्गा जमिन किन्ना चलन रहिन । मानाके प्रयोग हमार थारू समुदायके मनै करै । हमार आजी–आजा सक्कुजे एकर प्रयोग करैं । पहिले पहिले समान किनेक लाग रूपिया पैसा नैरहिन । जमिन किनेक लगफे मानाके प्रयोग करैं ।

पाठी
हमार थारू समुदायमे नाप टौलके बनाइल एक किसिमके औजार हो । पाठी विशेष कैके कठुवक बनाइल रहठ । एकर प्रयोग धान, गोहुँ, मकै, चाउर, पीठा टौलक लाग कैजाइठ् ।

ढरी
हमार पहिलेक पुर्खा ओइनके समयमे कौनोफे सर–समान नाप टौल करेक लाग टमान औजारके प्रयोग करैं । ढरी एक मेरके तराजुमे ढरके नपना बाँट हो । ढाइ किलोक् एक ढरी कैके मानजाए । एकर प्रयोग धान, गहुँ, मकै, लाही टौलना कामके लाग करैं । पहिले पहिले एकर प्रयोग कैजाए । मनो समय परिवर्तन संगे एकर प्रयोग हमार थारू समुदायमे लेप होगिल बा ।

सेर
हमार पहिलेक पुर्खा ओइनके समयमे कौनोफे सरसमान नाप तौल करेक लाग टमान औजारके प्रयोग करैं । सेर कलेक पहिलेक मनै बाटके रूपमे प्रयोग करैं । शेर तीन पाउक एक सेर मनैं । पहिलेक मनै जिम्डरवक् घर हुकनके खेतवामे काम करे जाइ टे धान, गहँु, चाउर, पीठा तौलके डेना कामके लाग प्रयोग करैं । पहिले हमार पुर्खा हुक्रे बहुटसे आदिवासी रहै । आदिवासी कलेक जेकरफे घरबाँस नैरठिन हुँकरे जिन्गिक गुजारा करेक लाग आनेक घरमे जाके काम करके अपन जिन्गिक गुजारा करैं ।

सवइया
हमार पहिलेक पुर्खा ओइनके समयमे कौनोफे सरसमान नाप तौल करेक लाग टमान मेरके औजार प्रयोग करैं । सवइया कलेक पहिलेक मनै बांटके रूपमे प्रयोग करैं । जौन समान फेन तौलेबेर सजिलो हुइन । सवइया एक पाउक रहठ । हमार आजीआजा हुक्रे काम करे जाइट टे चाउर, पिठा जसिन कहाय सामान तौलके डेना चलन रहिन । सवइया विशेष कैके पहिलेक जिम्डरवा हुकरे सरसमान डेहेबेर प्रयोग करैं ।

टखरि पसेरी
हमार पहिलेक पुर्खा ओइनके समयमे कौनोफे सरसमान नाप तौल करेक लाग टमान मेरके औजार प्रयोग करैं । पसेरी फेन सवइयाके हस सरसमान तौलक ल।ग प्रयोग कैजाए । पसेरी विशेष थारू समुदायमे प्रयोग करैं । पसेरी सवा किलोक एक पसेरी मान जाए । पसेरीके प्रयोग टे करैं मनो एकर पहिले हमार सुरुक पुस्ता पुर्खा ओइनके समयमे रहिन । मनो हमार बुढीबुढु ओइनके समयमे पसेरी बनाइक लाग इट्टा नै टे पठरासे नाप तौल करना काम करैं । पसेरीसे धान, गोहुँ, मकै जसिन टौलना करैं ।

मुर्रा
हमार पहिलेक पुर्खा ओइनके समयमे कौनोफे सरसमान नाप तौल करेक लाग टमान मेरके औजार प्रयोग करैं । पहिलेक मनै १० पाठिक एक मुर्रा मानै । मुर्राके प्रयोग पहिले भारीभारी जिम्डरवा हुकरे करैं । मनो सामान्य मनै हुकरफे कौनो सामान लेनडेनके बाट टे एकर प्रयोग करैं ।

हमार पहिलेक पुर्खा ओइनके समयमे धान, गोहुँ, मकै, तेल जसिन चीज नाप टोल करेक लाग टमान मेरके औजार के प्रयोग करैं । समयके संगे बहुट चीजÞ परिवर्तन हुइगिल । पहिले माना, पाठी, ढरी, सेर, सवइया जसिन टमान औजारसे नाप टोल करैं । आझकल असिन चीजÞ हेरागैल बा । आझ टेकनिक अटरा आघे पुग सेकल बा की सामानहे हाँठसे बाट ढरके तौले नैपरना जसिन यन्त्र बनाढरले बाटैं । पहिले पहिले तराजुके प्रयोग कौनोफे समान उठाइक लाग पसेरी पहिलेक हमार आजीआजा हुकनके बनाइल औजार हो । भारीभारी यन्ंत्रके प्रयोगसे हम्रहिन् बहुट सजिलो होगिल बा । आझकल ढेउर से ढेउर समान एक्केचोमे तौले सेकना यन्त्र बनगिल बा । जेकर कारण हम्रहिन् बहुट सहज लागठ । हमरे कम समयमे ढेउर काम करे सेकठी । दिन भर लगना ठाउँमे एक घन्टामे या फेन उहिनसे कम समयमे निपटा डेहेठ् । मनो हमर पुर्खा ओइनके बनाइल सामग्री हेरागिल (लोप) बा । टमान मनै बिसर गैल बटैं । की हमार पुर्खा ओइनके सामग्री प्रयोग कैके सामानहे नाप तौल करैं । हमार आजीआजा हुकरे प्रयोग करना यन्त्र हेरासेकल बा । कहुँ कहुँ यी यन्त्र ढरल डेखजाइठ । मनो एकर प्रयोग नैहुइठ् ।

शान्ती चौधरी


error: Content is protected !!