समानता, शिक्षा ओ रोटी
मनै मुअक टे जर्मलक नै हो, बेन जियक टे जर्मलक हो । प्याट केल पालक टे जिना टे संकिर्ण वा घिनलक्टीक विचार हो । अैसिन घिन लक्टीक विचारह ठाउँ देलसे मनै उन्नतिम नाही वेन बजहन्ने परजाइ । जिना टे एकठो कुकुरफे जियल रहठ । घिन लक्टीकसे घिन लक्टीक जीवफे जियल रठ । मनै नातासे मनै अस वाच परठ, कुक्राअस नाही । मनैअस जियक टे दुइ बाटके जरुरी बा । समानता, शिक्षा ओ रोटी ।
हमार पछगुरल दुःखी दरिद्री समाजम, शोषित समाजम किसान ओ मजदूर बर्गहन उप्कर करक लक दुइ बाट पुगल बाट कि नाही, यी बाट बिन बिनक हेर्ना जरुरी बा । रोटी के वारेम कहि एकठो किसान बहुट उब्जाइठ । एक कामम व्यस्त मनैन के नाता से ऊ भुख नै मुअ पर्ना हो । याकर ठिक उल्टा रोटीक उपयोग एक्थो किसान या मजदुर, कथ्याक कर्ति बाट यह फेन जान पर्ना बाट हो । खेती के बारेम एक्ठो किसान धान, गहुँ ओ चाना, कोक्नी लाही आदि बहट धेर उब्जाइठ टेफे याकर ठिक उल्टा ओहिहन मारक पानी फे कहाँ पुगल बा ?
यी कैसिन अचम्मके बाट हो । याकर बारेम टे हम्र सक्कुजन एक घरी विचार करी टे ? तव हमन उत्तर अपनहे आ जाइ । यी कौनो अचम्मके बाट नैहो, यी टे हमार शोषकसे दबल रहना हमार कम्जोरी हो । याकर मुख्य कारण दबाब बा अशिक्षा हो । मेहनकस जात आनक कमैया हुइठ, आल्सी मालिक बन्ठ । यी उल्टा चिजह जलुकसम सपिल्टा नै बनाजाइ तलुकसम शोषण रहति समाजके सृजना कब्बु फेन नै हुइ स्याकी । औ मानवम सुखी जीवन कब्बु फे नै आइ स्याकी । परिश्रम के मिठ इज्जत नै मिल्ना जिवन ऊ जिवन नै हो, वेन मुलक हो । अस्तित्व रलक जीवन मुअल नै हो वेन जिलक हो ।
शोषक ओ जिम्दरवा अनावश्यक दबाब ले मेहनत कस जातक जीवन हन टुक्राइल बा, घिन लक्टीक वा और भटकाइल बा । यी अवस्था हन सम्झ लायक बा कि ऐसिन फझेटम परल जीवनसे वेन संघर्ष (लर्ना) मज्जा बा । जब मनै मनैनम एक्क नास व्यवहार नै हो टे, इ संसारम कुुछु नै हो । वह वर्से ऐसिन जिवन नरक जैसिन बा । गोचाली हुक्र नरक उहाँ बा, जहाँ दुःख बाट । यहाँ प्याटभर खाइ नै मिलठ, जहाँ सक्कुवर्से मरिचसक मुअ परठ कलसे यहाँ हो नरक । सम्झी गोचाली हुक्र यहाँ मोर नरक बा । जहाँ शिक्षाके सताहा अंधार ओ असामनता बा । वह ओर्से नरकसे टे बेन अधिकार ओ कर्तव्य पाइक लाग संघर्ष कर्ना मजा बा ।
हम्र देख्ठी मीलम मजदुर हुक्र बहट चीज तयार कर्ठ टे ठीक याकर उल्टा मजदुर मरिच बन्ल रठ । उब्जलक चीज पूजिपति अथवा मलिक्वनके प्याटीम आइठ । मजदुरहुक्र अपन उब्जलक चीज बेल्स नै पैठ । अत्रासे कत्रा कना हो टे ? वस्तक वहुत दिनसे किसान ओ श्रमिकवर्ग आनक कमैया बन्ल बैठल बाट । शिक्षा वर हुक्र स्वतन्त्र नै हुइत । अस्वतन्त्रताके पिजराम विद्यादेवी कसिक आइ सेक्हीन । धनदेवीक डाट फटकारसे विद्या देवी टे उहासम पुग नै सेक्ठी, जहाँ एक ओहोर गरिब किसान बाट । वह वर्से श्रमिकवर्ग जस्त रहल वस्त बाट । शिक्षा ओ समान्ता बिना श्रमिक वर्ग अन्धारम बाट । सब्से वर धन विद्याह हम्र भुल्वी कलेसे हम्र कब्बु नै उठ सेक्बी । दबल रहबी ओ फझेटम पर्ल रहबी ।
पूजिपति हुकन श्रमिक वर्ग शिक्षित हो जैही कना बहुट भारी डर बाटन । काकर कलेसे शिक्षित मनै चतुर रठ । उहीह अपन अधिकार ओ कर्तव्यके ज्ञान हुइठिस । शिक्षित मनै दवाव सह नै स्याकत कना पूजीपति हुकन थाह बा । ओहवर्से हुकन दवाके अनावश्यक जंजिरम बान्ध नै सेक्बो कन डर बाटन । गरीब, किसान, शिक्षित बनहि टे हुक्र धनी किसान के लर्कनह खसैना चासो करही कना डर बाटन । सद्धभर हुकनह बनावटी बनाक नै पढल गरिबह धर्म के भुल भुलैयम पर्ना हुक्र काम कर मन परैठ, अप्न सद्दभर मालिक बन्ना मन परठ ।
वह ओर्से हम्र तरक बाट नै भुली । पढी हम्र ज्ञानी बनी । दबाब हम्र हटाइ, वैज्ञानिक बनी । हम्र आब नाम कमाइ । दास प्रथा हटाइ । हम्र पुरान विचार छोरी, लौव विचार लेक आग बह्री । नै टे हमन आमीन वस्तह दवावम पर परी । दास प्रथा आझुक जुगम घिनलक्टीक चलन हो । यही कौनो फेन किसान मन नै पराइत । साँस जाइ बेन दास नाइ बन्वी कना विचार लेक संसारम ह्रम आग बढवी कलसे शोषण ओ दबाब हमार समाजमसे हेराइ । तब हम्र, समना सुखी बन्बी । परिश्रमअनुसार फल हमन खोज्ना अधिकार बा । समान्ता, शिक्षा, रोटी रोजी परिश्रमअनुसार पाइक टे हम्र आखिरी साँस सम लडी ।
