बिफे चैत १५ , १५ चैत्र २०८०, बिहीबार| थारु संम्बत:२६४७

रंगीबिरंगी फुला

रंगीबिरंगी फुला

फुला कना अइसिन चिज हो । जेकर सुन्दरतासे सारा दुनियँक् मनैनके मन लोभ्याइ सेकठ । संसारहे सुन्दर बनैनामे फुलाफें एक हो । जैसिक यि संसार हरेक चिजले सजल बा । ओस्टेक फुलालेफें सजल बा । फुला बिनाके संसार कैसिन डेखाइ, बिना मनैनके यि संसार रहठ ओस्टे फुला बिनाके यि संसार कसिन डेखाइ । फुला अइसिन चिज हो दुःख परल बेला मनैनके मनहे खुसी बना डेहेठ । फुला बिनाके यि संसारफें अधुरो जस्टे लागठ । फुला सक्कु कामके लाग प्रयोग कैजाइठ । मैननके जिन्गीमे जन्मठेंसे मरनसम् फुलाके प्रयोग कैजाइठ । यि संसारके मनै हरेक बातबातमे भेडभाव करठैं । मने फुला किल अइसिन चिज हो जोन धनी मनैयाँफें अपन काम लगाइ सेकठ ओ गरिब मनैयाँफें । फुला कौनो मनैयाँ नैहेरठ कि यि छोट जातके हो यि बर जातके कहिके । जैसिक मनै सुन्दर डेखाइक लाग सिंगार पटार करठैं ओस्टेक यि संसारफें सुन्दर डेखाइक् लाग फुलाफें हुइना जरुरी बा ।

फुला हमार जिन्गीके हरेक काममे प्रयोग कैजाइठ । मानव जिन्गीमे जसिक औरे सामानके महत्व बटिस ओस्टेक फुलाकेफें अपन महत्व बटिस । बच्चाके जन्ममे खुसीके समयमे बच्चाके न्वारनके काममे प्रयोग हुइठ । फुलाहे भोजभटेर जैसिन शुभ काममेफें विशेष प्रगोग कैजाइठ । ओस्टेक कौनो मनैयाँ यि संसार छोरके जैठैं टबफें फुलाके प्रयोग कैजाइठ । मानव जिन्गीमे फुलाके महत्व ढेर बटिस् । मनैनके जिन्गीमे फुलाके अइसन महत्व बटिस अइसिन लागठ कि फुला नैरहि टे मनैनके जिन्गी खालीखाली हस रहि । अस्टेक फुलाके टमान काममे प्रयोग कैजाइठ । मनैनके आस्थामे फेन फुला जो काम लगठिन । फुला हरेक ठाउँसे लेके हरेक चिज सुन्दर डेखजाइठ ।

फुला लगैना कौनो सिजन नैरहठ । हमार नेपालमे टमान मेरके फुला पाजाइठ । नेपाल एकठो सुन्दर बगिया कैहकेफें चिन्ह्जाइठ । गाउँघर ओहोरके मनै असार सावन ओहोर टमान मेरके फुला सक्कु गाउँके डगर डगरमे लगैठैं । जगमग फुलल् फुलासे पुरा गाउँ सुन्दर डेखाइठ । ओस्टेक अझकलके मनै फुलाके व्यापार करे लागल बटैं । फुलाहे जोन समयमेफें लगाइ सेक्जैना सहजता हुइल बा । फुला नैसुग्घुर ठाउँहेफेन सुन्दर बनाडेहेठ । फुला कटि किल मनैनके अनुहारमे चमक आजाइठ । पहिलेक मनै काहे फुला डेके अपन मैयाँके प्यार करैं ? कारन फुला अइसिन चिज हो मनैनके मन लोभ्याइठ । टुटल सम्बन्धहे जोरना कामफें फुला करठ । फुलामे झमल बटैं यि संसारके मनै । फुला हरदम मजा काममे प्रयोग करजाइठ । फुलासे वातावरणफे स्वच्छ ओ सफा हुइनाके संगे सुन्दरफें डेखजाइठ ।

मनैनके जिन्गी हेर्ना हो कलेसे फुलाके महत्व ओ फाइदा टमान बा । मनै फुलाहे मनैयाँ जन्मनासे लेके भोजभटेर ओ दाह जसिन शोक काममे फुलाके प्रयोग कैजाइठ । मनैनके जिन्गीमे फुलासे टमान फाइदा हुइल बटिन । मनैन खुसी बनाइ परल फुला चाहल, बच्चा जन्मलमे, भोजभटेरमे, मरनीकरनीमे, कोनो ठाउँ सजैना, बिरुवा बनैना, मुहम् लगाइक लाग किरिम बनैना, कपारीम लगैना जसिन टमान फाइदा मनै लेटि आइल बटैं ।

हमार समुदायमे टमान मेरके फुला मिलठ । फुला अनुसार सक्कु फुलक् अपन महत्व बा । टमान फुलाके प्रकार मध्य कुछ फुला यि मेरके बा ।

१.बेबरी फुला
२.डौना फुला
३.डुब्बा फुला
४.जोगनिहुवा फुला
५.केंचुर फुला
६.लज्मुनी फुला
७.रानी गेंडा फुला
८.आलु फुला
९.दिनघुमनी फुला
१०.घन्टी फुला
११.गुलाब फुला
१२.लालीगुँरास फुला
१३.सुर्यमुखी फुला
१४.डाँफे फुला
१५.पियाज फुला
१६.लसुन फुला
१७.चम्फा फुला
१८.कटकुइयाँ फुला
१९.चमेली फुला
२०.बरमसिया फुला
२१.सुपारी फुला
२२.क्रेप चमेली फुला
२३.पानी लिली फुला
२४.डेजी फुला
२५.लाल कमल
२६.केंउला फुला
२७.मुरिया फुला
२८.नरसिसस
२९.मौसारी फुला
३०.डजी फुला
३१.गेन्डा
३२.टिउरी
३३.लभर फुला
अस्टेक हमार नेपालमे टमान मेरके फुला मिलठ । फुला लेके यि पुरा संसार सजल बा । फुला कौनोफें चिजहे आउर सुन्दर बनैना काम करठ । हमार देश नेपालहेफें लालीगुरास फुलासे चिन्हाँगैल बा । फुलाले मनैनके मनहे परिर्वतन करे सेकजाइठ । असिन चिज हो फुला ।


error: Content is protected !!