हँसिया ः हँसिया अन्नबाली कट्ना औजार हो । सक्कु नेपाली हँुकरे हँसियाके प्रयोग करठैं । हँसिया बिशेष कैके धान, गहु, टिना, घाँस जसिन टमान कामके लाग हँसियाके प्रयोग कैजाइठ । हँसिया आँखर लोहसे बनैठैं । हँसिया पहिले लोहारिनसे बन्वैना चलन रहे । मने अझकल बजारमे बनिक्बनावल हँसिया फेन मिलठ् । कहुँ कहुँ अभिनफें लोहारिनसे बनैठैं ।

कोड्र««ा ः कोड्रा बारी कोर्ना औजार हो । बारी कोर्ना कामके लाग कोड्राके प्रयोग कैजाइठ । कोड्राके सहायतासे घरके बारीमे टिना लगाइक लाग, बारी कोर्ना जसिन काममे कोड्रा काम लगैंठ । बिशेष कैके पहाडी ठाउँमे कोड्राके प्रयोग कैजाइठ । खेतीपाती करेबेर फेन कोड्रा बेलस जाइठ् ।

बाँका ः बाँका झाला कट्ना औजार हो । बाँका झालापाटा कट्ना काममे प्रयोग कैजाइठ । बाँकाके धार भारी रठिस । बाँका बिशेष कैके ढर्हिया, डिलिया, छिट्नी, सुप्पा बनाइक लाग बाँस जसिन टमान चिज काटक् लाग बाँकाके प्रयोग कैजाइठ ।

कुरहार ः कुरहार काठी चिरक् लाग प्रयोग कैजाइठ । कुरहार बनाइक लाग भारी लोह ओ सख्वक बेंट चाहठ । कुरहारके प्रयोग बिशेष कैके काठी चिरक लाग ओ रुखवा काटक् लाग प्रयोग कैजाइठ ।

टेंगारी ः टेंगारी झारपाट कट्नासे लेके रुखवा मनसे बोक्ला छुटैना कामके लाग प्रयोग कैजाइठ । बन्वाँ काठी करे जाइबेर काठी काटक् लाग टेंगारीके प्रयोग कैजाइठ । टेंगारी कुरहारसे छोट रहठ् ।

खुर्पा ः खुर्पा बियार काटक् ओ घाँस छिलक् लाग प्रयोग कैजाइठ । बिशेष कैके बारी मनिक् घाँस छिलक् लाग ओ बियार उखर्ना काममे प्रयोग कैजाइठ । कठुवक् बेंट लगाइल रहठ । एकर ढार चापर रठिस् ।

हँस्ली ः हँस्ली पहिलेक मनै बच्चनके ढोंहरी कट्ना काममे प्रयोग कैजाए । हँस्ली बच्चनके सिरहन्नीमे ढर्ना चलनफें गाउँ समाजमे बा । छोट बच्चा हुँकरे धान काटक् लागफें हँस्ली प्रयोग कैजाइठ् ।

गँर्सा ः गँर्सा घाँस कट्ना कामके लाग प्रयोग कजाइठ् । बिशेष कैके गँर्सा प्रयोग घाँस छन्डरक् लाग प्रयोग कैजाइठ । घाँस कट्ना बाहेक सिकार ठुंगना काममेफें गँर्साके प्रयोग कैजाइठ ।

चक्कु ः चक्कु टिना कट्ना काममे प्रयोग कैजाइठ । बिशेष कैके चक्क्ुके प्रयोग भन्सामे टिना कट्ना, सिकार कट्ना जसिन टमान काम करठैंं । आउर आउर कामके लाग फें चक्कु काम लगाइ सेक्जाइठ् । इ ढरयार मेरके रहठ ।

छुरिया ः छुरिया सिकार कट्ना काममे प्रयोग कैजाइठ । छुरिया बिशेष कैके बुच्चर हुँकरे सिकार कट्ना काममे प्रयोग करे सेक्जाइठ । इ फेन ढरयार मेरके रहठ् ।

झिंर ः झिंरमे खास कैके सिकारके पकुवा भुजक् लाग ओ आगीमे सिकार पकाइ सेक्जाइठ । झिंर पाटिर लोहले बनाजाइठ । पहिलेक मनै बिशेष कैके झिंरके प्रयोग मुस भुजक् लाग करैं । पहिलेक मनै मिझनी खाइक् लाग आगिमे सिकार पकाइबेर झिंरके प्रयोग करजाइठ । झिंर पाटिर पाटिर लोहक् लम्मा लम्मा रहठ् ।

आरा ः आरा रुखवा कट्ना काममे प्रयोग कैजाए । आरासे कौनोफें भारी रुखवा काटे सेक्जाइठ । रुखवा काटक् लाग आराके प्रयोग हुइठ् । चापर, पाटिर, लम्मा ओ दाँत रहल एक मेरके ढरयार हँठियार हो आरा ।

आरी ः आरी रुखवा कट्ना ओ चिरना काममे प्रयोग करठैं । पहिलेक मनै आरी रुखवा चिरक लाग ओ कट्ना काममे प्रयोग कैजाइठ । आरीके प्रयोगसे टेबल, कुर्सी, पलंग ओ फर्निचरके लगायत टमान काममे प्रयोग करजाइठ । आरी फेन चापर, पाटिर, लम्मा ओ दाँत रहल एक मेरके ढरयार हँठियार हो आरा ।

रुखान ः रुखान खटिया बनैना, कर्सी बनैना, टेबल बनैना जसिन काममे प्रयोग कैजाइठ । बिशेष कैके रुखान खटियक् मचुवा खोल्ना, फर्निचरके कामके लाग रुखानके प्रयोग कैजाइठ । खान फेन पाटिर लम्मा ढरयार हँठियार हो ।

गिरमिट ः गिरमिट लोहक बनल रहठ । गिरमिटके प्रयोग टखट, डराज, कुर्सी, टेबल जसिन फर्निचर सामान बनाइक लाग प्रयोगे कैजाइठ । बिशेष कैके कौनोफे ठाउँ फोंघ पर्ना काममे प्रयोग कैजाइठ । गिरमिट पाटिर लम्मा आकारमे बनल रहठ् ।