असार पन्ध्रहे मध्य बर्षायाम मानजाइठ । असार पन्ध्रमे सक्कुजे चिउराके व्यवस्थापन करठैं, दहिफें खोजले रठैं । एम्ने टमान मनै मौसमी फल आमके स्वाद मिलाइ सेक्जाइठ । घर घरमे दहि चिउरा खैना दिन हुइलक ओरसे यि दिन प्रत्यक घरमे दहि ओ चिउरा खैठैं । सक्कु जहन पटा रठिन यि दिन दही ओ चिउरा खैठैं कैह्के । दहि चिउरा खैना कलक हमार परम्परा हो ।

माना खाके मोरै लगैना सिजन हमार मुलुक कृषिमे आधारीत बा । हमार टमान जसिन थारु जातिनके जिन्गी खेतीपातीमे आधारीत बटिन् । टमान मनै पशुपालन ओ अन्नबाली लगैना काम करठैं । असार, सावन बर्खाके सिजन कलक खेतीबारी लगैना सिजन कैह्के चिन्हजाइठ । यि समयमे धान लगायत अन्नबाली लगैना काम करठैं । खेतीबारीक लाग यि सिजन बहुट उपयुक्त मानजाइठ । किसाननके लाग यि समय खेटवामे धान लगाके रमैना सिजन हुइटिन् । किसाननके लाग यि समय जटरा कररा हुइलेसेफें धान लगैना समयमे खेटवाके माटीमे खेलके, हिलवामे खेलके, मलखाद डारके खेटवा तयार परठैं । बिहन्नीसे साँझसम खेटवामे डँटल रठैं टबहिं असारहे ‘माना खाके मोरै लगैना सिजन’ कठैं ।छोठ ओ मिठ परिकार कामके समय हुइल बेला किसान हुकनके लाग छोट ओ मिठ मानजाइठ दही–चिउरा । दही ओ चिउरा टयारी परिकार हो । यिहिन औरे परिकार जस्टे पकाइ नैपरठ । दहि–चिउरा बनैना समय नैलागठ । कामके सिजनमे एकर प्रयोग करे सेक्जाइठ । दहि–चिउरा औरे तयारी परिकार मनसे मिठ रहठ ।सिट्टर ओ मजासे पचाइ सेक्ना खाना दहि पाचन यन्त्रके लाग बहुट उपयोगी मानजाइठ ।

दहिमे रहल ब्याकटेरिया हुकरे हमार पाचन प्रक्रियामे सहयोग करठ । दहिहे घामके समयमे टमान जसिन अत्यधिक प्रयोग करजाइठ । दहि हमार शरीरहे सिट्टर लगाइठ । सामान्यतया दहिमे कार्बोहाइड्रट ओ भिटामीन बी, सी मिलठ । एक हिसाबसे कना हो कलेसे दहि हमार शरीरके लाग औषधीके काम करठ ।दहि–चिउरा खेतीबारीके समयमे किल खैना परिकार हो । संगसंगे असार पन्ध्रमे किल खैना परिकारफें नैहो । दहि चिउरा बिशेष कैके बर्खा समयमे खैना खाना हो । बर्खाके समयमे खैना खाना बसैना, गलना हुइना हुइलक ओरसे दही–चिउरा उपयोगि मानजाइठ । हालि बनाइ सेक्ना, मिठ ओ सजिलसे पचाइ सेक्ना हुइल ओरसे यि समयमे हमार शरीरके लाग बहुट उपयोगि मानजाइठ । असार महिना सम दहि चिउराहे नियमित नास्ता बनाइ सेक्लेसे हमार स्वास्थ्यमे लाभ मिले सेकठ् ।