हमार थारु जातिनमे टिहुवारके बौछार रहठ् । सावन परटि किल टिहुवार अइना सुरु हुइजाइठ् । सिजन अनुसारके टिहुवारमे सिजन अनुसारके खानपिनके व्यवस्थाफें हुइल रहठ हमार थारु जातिनमे  । हमार थारु जातिनके टरटिहुवार,मर्निकर्नि, खानपिनमे  एकठो किल नाही मेरमेरइक चिज बनाके खैना चलन पहलेके पुर्खनके समयसे चल्टी आइल बा । टिहुवार, खानपिनके समय हुइटी किल हमार जातमे अपन अपन नातपातन, चेलीबेटीन, घर गोट्यार, गाँउके आसपासके मनैन बलाके खानपिन, मेरमराइक नाचगान करटी रातभर जाग्राम फेन कैजाइठ । हरेक टिहुवारमे अलग अलग किसिमके परिकार बनाके खैना चलन बा  हमार थारु समुदायमे ।परिकार मध्ये थारु जातिनके खँरिया परिकारहे एक खास परिकारके रुपमे खैना चलन बा ।

हमार थारु जातमे इ परिकारहे खास करके अँट्वारी, अस्टिमकीमे बनाके खाजाइठ । अपन अपन ठाउँ अनुसारके फरक–फरक मेरके बनाके खेठैं । हमार थारु जातमे इ परिकार हे कोइ खरिया कहठैं टे कोइ पटुस्नी कठैं । हमार आजापाजाके समयसे बनाइल टिहुवार अँट्वारी टिहुवार हो । अँट्वारीमे मेरमेराइक  खैना परिकार बनाके डेहे जैना चलन बनैले बटैं हमार पुर्खा ओइने । पहिलक्  मनैं खँरिया बनाइक लाग घरही ढेंकीमे धान कुट्के फटकके चाउर निकारके चाउरहे मिलिममे पिसाके खँरिया बनाइँट । मने अझकल आधुनिक युगमे पिठा तयारी अवस्थामे मिलठ् टुरुन्ट बजारसे नानके बनाके खाइसेकजाइठ् ।

खँरिया बनैना तरिकाथारु जातिनके परिकार खँरियाहे बनाइ लाग बहुत चिजके आवश्यकता परठ् । खँरियाहे उहुजाइक लाग पैन् एकदम जरुरी रहठ् । पैनहे ढकिया बनाइहस् बनेले रठैं । पैन गोल आकार के रहठ । पैन पिठा, नोन, मिरचा, तेल, बेसार,पानी, जिरा, ढनिया अट्रा समान रलेसे बहुत मिठ खँरिया बनाइ सेक्जाइठ । सुरुमे भाँरामे पानी डारके २५–३० मिनेटके लग  रिझाइ डरना, अढन आइ डेना । टब जाके पिठामे स्वाद अनुसार नोन, बेसार, मिर्चा, मसला डारके पिठाहे मजासे सन्ना । पिठाहे मजासे सानके सेकके  हाँठके सहयटा ले लम्मा आकारमे बनैना । लगभग (१०–१५) सेन्टीमिटर लम्मा सम रहठ । लम्मा ढिकरी जस्टे बनाके हाँठले हलका हलका डाबके बनैना । रिझाइ डारल पानीके अढन आइ लग्टी किल भाँराके उप्पर पैन ढरना । टब पैनमे एक एक चुटी करके १०–१० मिनेटमे खँरियाहे डरटी जाइ परठ ।

आधा घण्टा रहिके उहुज्जाइट् खँरिया । उहुजके सेकल खरियाहे पानी लगालगा हाँठसे छुटाइ परठ । छुटाके सेकके हँसियामे तेल लगाके काटे परठ, टब भाँरामे तेल ढिकाइ डारे परठ । टब तेलमे खँरिया डारके मजासे भुठे परठ । १०–१५ मिनेट भुटके तयार हुइजाइट् खँरिया । खरियाके स्वाद एकदम मिठास रठिस् । हेरटी किल खाँउखाँउ लागठ् खँरिया परिकार हे ।असिके तयार करठैं, हमार थारु जातिनके खँरिया पकिारहे । हमार थारु जातिनके कैयो मेरिक पकिार बा । पहिलेक हमार पुर्खा उइने भुख लागल समयमे मिझनीके रुपमे रोटी, मकै, खँरिया, मार, फुलौरी इ सब चिजके मिझनी बनाके खाँइट् ।