हमार थारु जातिनके कौनोफें समान उठाइक लाग ओ ढारक लाग टमान मेरके हाँठेसे बिनल समान बनाके बेल्सना चलन बा । पहिलेक हमार बुडिबुडुनके चाउर केराइक लाग सुप्पा, गोबर फेंकक् लाग छिट्रहिया, धान ढारक लाग छिट्वा, घाँस काटक लाग खैचा जसिन टमान समान अपन हाँठेसे बिनिट । पहिलेक मनै जटराफें समान बेल्सिंट सक्कु अपन हाँठेसे बिनके काम चलाइँट् । हमार पुर्खनठें टमान मेरके सिप रहिन् । हरचिज अपने हाँठेसे बिनके कौनो फेन काम करिंट । कुछ समान यि मेर बा ।

सुप्पा
हमार थारु जातिनके टमान हस्तकला मध्य सुप्पाफें एक हो । पहिले पहिले थारु समुदायमे किल प्रयोग कैजाए । मने समयके संगे थारु जातिनके सुप्पा सक्कु समुदायमे प्रयोग कैजाइठ । थारु जातिनके सुप्पा बाँससे बनल रहठ । सुप्पा बनाइक लाग कच्चे बाँस चाहठ । कच्चे बाँसहे काटके मजासे सफा करके बाँसहे दुइ अंगुरके फरचाके मजासे सफा करके सुप्पा बिनक लाग तयार कैजाइठ । सुप्पा अझकलके मनै बनाइ नैजन्ठैं । समयके संगे आधुनिक तरिकाके सुप्पाफें बजारमे डेखे सेक्ठी । मने बजारके सुप्पासे घरेक बनाइल सुप्पा रुचैठैं । सुप्पाके टमान कामके लाग प्रयोग कैजाइठ । जस्टे चाउर फटकक् लाग, गोहुँ फट्कक् लाग, लाही फट्कक् लाग, धान ओसाइक लाग, सिढरा सुख्वाइक लाग जसिन टमान काममे सुप्पाके प्रयोग कैजाइठ । हमार बुडिबुडुनके अपन हरचालीक् लागफें सुप्पा बिनिंट । सुप्पा हमार लर्का जल्मलेसे घटुवासे निकारे बेर सुप्पामे चाउर ढारके चाउरसे सुटाके निकरना चलनफें हमार थारु समुदायमे बा ।

छिट्वा
हमार थारु जातिनके टमान हस्तकला मध्य छिट्वाफें एक हो । छिट्वाफें बाँससे बिनल रहठ् । छिट्वा बनाइक लाग बच्चे बाँसके प्रयोग कैजाइठ । कच्चे बाँस प्रयोग कर्ना कारण कि बाँस कच्चे रहठ टे सजिलसे बाँससे जसिनफें आकारके समान बनाइ सेक्जाइठ । छिट्वा बनाइक लाग बाँसहे पाटिरसे चिरके मजासे हँसियासे सिटके सफा कैके बनाइक लाग तयार कैजाइठ । छिट्वा टमान काममे प्रयोग कैजाइठ । छिट्वा विशेष धान ढारक लाग प्रयोग कैजाइठ । धान बोक्नाके संगे टिना टावन टुरक लाग ओ डोनी, टेपरी लगाके ढारक लागफें छिट्वाके प्रयोग कैजाइठ । छिट्वा विशेष थारु समुदायमे प्रयोग कैजैना समान हो ।

छिट्नी
हमार थारुनके टमान हस्तकला मध्य छिट्नीफें एक हो । छिट्वासे छोट छिट्नी रहठ् । छिट्नीफें छिट्वाके जस्टे बाँसहे छिट्वासे आउर पाटिरसे चिरके मजासे सफा कैके छिट्नी बनाइक लाग तयार कैजाइठ । छिट्नीके प्रयोग टमान कामके लाग कैजाइठ । कौनो कौनो जातिनके मनै छिट्नीके प्रयोग डुलही भिट्रयाइक लागफें करठैं । छिट्नी अस्टिम्कीमे ओ अट्वारीमे अग्रासन डेहेक लागफें प्रयोग कैजाइठ । पहिलेक मनै पहुनि खाइ जाइक लाग छिट्नीमे पहुरा लेके जाइँठ् ।

खैंचा
हमार थारु जातिनके टमान हस्तकला मध्य खैंचाफें एक हो । खैंचाफें बाँससे बनल रहठ । खैंचा छिट्वासे भारी रहठ् । खैचाके आकार भारी रठिस् । खैचा विशेष घाँस ढारक लाग प्रयोग कैजाइठ । मुर्घी छोपक् लाग हमार थारु समुदायमे प्रयोग हुइल डेखजाइठ । खैचा पहिलेक मनै बियार बोकक् लाग फेन काम लगायँट् ।

छपरिया
हमार थारु जातिनके टमान हस्तकला मध्य छपरियाफें एक हो । छपरिया बिनक लाग बेंटके प्रयोग कैजाइठ । छपरिया थारु समुदायमे प्रयोग कैजाइठ । छपरिया विशेष कैके गोरु भैसिनके गोबर फेंकाइक लाग प्रयोग कैजाइठ । छपरिया पहिले पहिले प्रयोग कैजाए, अझकल कमे डेख्जाइठ । छपरिया अझकल लोप हुइटि बा ।