कंचनपुरके बिचपुरी कना गाउँमे बैठ्के समाज सेवा कर्टी आइल बटैं काल डंगौरा । कालु डगैरा एकठो समाजसेवी किल नैहोके गाउँ चलुइया भलमन्साफें हुइँट् । उहाँ एक मेहेनटि किसान फें हुइँट् । कालु डंगौराके गाउँके मनैफे बहुट मजामजा बटिन । अपन गाउँमे एकरुता बटिन । हुँकारके गाउँ समाजके किसनवाँ हुकनके बिच्चेम । कालु डंगौराके अपन परिवारफे भारी बटिन । उहाँके ३ ठो छावा ओ ३ ठो छाइ बटिन । आझ कालु डंगौराके सेवा करट १० बर्ष होगिलिन । आझ सम कालु डंगौरा अपन अमुल्य योगदान डेले बटैं ।

कालु डंगौराके जिवन काल बहुट नै मजा हुइटिन । समयमे पहर्ना बहुट भारी सपना रहिन । पहिलक पुर्खा हुँकरे हुकनके सोचके कारनसे हुकार पहर्ना सपना पुरा नैकैलिन । कालु डंगौराके कहाइ बटिन कि मै स्कुल पहरे जाउँ टे मोर बाबा महिन बनवाँ फाँरे पठाए खेटवा बनाइक लाग । महिन कबु गोरु चहराइ पठाए टे कबु खेटवा जोटे पठाए । मै नुकनुक स्कुल चलजाउँ कना कहाइ कालु डंगौराके कहाइ बटिन । असिके कालु डंगौरा अपन बाबा के कारन अपन सपना पुरा नैकरे सेकनै । आझ कालु डंगौराके पहिले मोहेनटके फल आझ अपन बच्चा हुकनके लाग टमान जमिन बना डरले बटैं । आझ कालु डंगौराहे गाउँके एकठो जमिन्डार कैकेफे चिजिठैं । हरेक ठाउँमे मान सम्मन कर्ठ कालु डंगौराहे । जोन डिनसे गाउँके भलमनसा छनोट कलिन टबसे आझ सम अपन ओहोरसे हुइना सक्डो सहयोग डेटि आइलटैं । कालु डंगौरा ढेर नैपहर्ले हुइट टबफे उहाँ खेटवा कटरा बिघा, कटठा, धुर बा कैके बिना नपले बटाडेठैं । एक किसिमके भगवाके बरडान पाइल बटैं ।

गाउँमे योगदान
कालु डंगौराके आधा जिवन अपन गाउँके सेवामे बिटैले बटैं । अपन गाउँहे कैसिक मजा बनैना हो कना सोच ओ प्रयास आझ सम बटिन । यि गाउँमे ६० ठो घरधुरी बटिन । छोट बटिन तर बहुट मजा बटिन कालु डंगौराके गाउँ । गाउँमे नेपाल सरकारसे जट्रा बजेट आइठ टे अपन गाउँके लाग योगदान मागे पाछे नैपर्ठ । गाउँके लाग आइल बजेटहे कसिक कहाँ ओ का कामके लाग प्रयोग कर्ना कैके सक्कु गाउँके किसन्वा हुकनके सर सल्लाह लेके किल कौनो काम करवइठैं । काम करक लाग सक्कु गाउँके किसन्वा हुकन मिलके काम करवइठैं । आझ यि गाउँमे औरे गाउँसे मजा बनाडरले बटैं । यि गाउँमे एकअर्का प्रतिके सहयोग बहुट मजा बटिन । कालु डंगौरा अपन गाउँके झगरा सुलझैना किल नै औरे गाउँक झगराहेफे अपन गाउँके झगरा सुलझैठ ओस्टे मिला डेठैं । उहाँके इज्जट सक्कुजे करलक ओहोरसे उहाँके बाट सक्कुजे मनठैं । कालु डंगौरा समाज सेवा कर्ना क्रममे टमान मनैनसे गारिफे सुनैलैं । समाज बनल बा टे मजा ओ नै मजा मनैफे रठैं नै मजा मनैफे रठैं । तर उहाँ कब्ुफे अपन गाउँक मनैनके बाट नै सुनैंलंै । टबेक मारे आउर उहाँके इज्जट मनैनके आघे बहरल बटिन । कालु डंगौरा गाउँके भलमन्सा किल नै होके गाउँके डेसबनढीया के रुपमेफे काम करठैं । गुरवासे मिलके गाउँ घरके भुट्वाफे बनैना काम करठैं । गाउँमे किउ बेराम रठै टे फे उहाँक् ठे आछट पाटि हेरवाइ अइठिन । किउँ रातके बिमार होगिल टे रातके १÷२ बजे रातके अइलेसेफे उठके आछट हेरडेठैं ।

अपनेहे बेराम रठैं टे कब्बुफे अपन दुःखहे केकरो आघे व्यक्त नैकरठैं । छोटछोट बिमारहे सामान्य तरिकासे पार कैडरठैं । जिवनमे हरेक तरिकाके समस्या डेखल मनैयाँ हुइँट कालु डंगौरा । जिवनके जैसिन समस्या अइलेफे कौनो डगरमे नै डगमगैना मनैयाँ कालु डंगौरा हुइँट् । आझ उहाँ अपन सक्कु छावा हुकनके भोज कैके अपन सक्कु जिम्मा अपन छावा हुकनहे डेहल बटैं । सक्कु जिम्मा लेनिन् तर गाउँ चलैना जिम्मा नैलेनिन् । कालु डंगौरा हुँकार छावा हुँक्रे जिम्मा लेना मन नै करठिन । कालु डंगौरा सोचठ् कालके दिन मैं मरहर जिमटे मोर गाउँहे के हेरी । आझ कालके मनैन अइसिन काममे मन नै लगठिन । तर उहाँ कठैं जबसम मै रहम टब सम मै अपन गाउँक लाग ज्या हुइसेकि सब काम करम कना उहाँके कहाइ बटिन । उहाँ सिखैठैं अपन छावा हुकन समाज सेवामे जोन आन्नद बा उ आन्नद कौनो काममे नै हो । तर आझ कालके युवा हुक्रे समाज सेवासे ज्यादा समाजहे कसिक बिगर्ना हो कना साेंचठैं । आझके युवा हुकन डेखके कालु डंगौरा बहुट सोंचठैं । उहाँ हुकिन लगठिन मोर छावा हुँक्रे काहे नैबुझठैं । केउ टे गाउँ हेरे परल कना कहाइ कालु डंगौराके बटिन ।

उहाँके सोचाइ एकडम मजा बटिन । अपन गाउँ प्रतिके सोच एकडम मजा बटिन । गाउँके रेखडेख कैसिक कर्ना हो जैसिन बाट कालु डंगौराहे पता बटिन । उहाँके सोंच बटिन कि महिनसे मजा मनैयाँ मोर गाउँ हेरे । उहाँके जैसिन काम ओ सहयोगके भावना नैहुइटिन । आझके युवा हुँक्रे अपन बारेम किल साेंचठैं । ठनिक् सहयोग करेपर्ना टे हजार बाहाना करठैं आझ कालके युवा । अपन ओहोरसे कालु डंगौरा हार नै मानल हँु कठैं । उहाँके असिन सोंच डेखके हर कोइ मैं भलमनसा बन्नास लग्नाहस तर फे उहाँके गाउँके मनै काहे जिम्मा लेनासे डरैठैं । कालु डंगाौरा सिखाइक् लाग भलमन्सा नै बनम कठैं टे हुँकार गाउँके मनै कठिन हम्रे कुछ नै जनठि कठैं । उहाँ कठैं मैं सिखैम टे हुकिन कठिन जब सम बहुट्टे गाउँ हेर्ना जिम्मा टोहाँर हो कठिन । उहाँ हुकिन बहुट दुःख लगठिन ।

काहे आझके युवा असिक बिगर गिलैं । आझके युवा हुकन टे अपन संस्कृतिफे पत्ता नै हुइहिन । समाज सेवा जसिन काम हुकन का मजा लगहिन । आझ कालके युवा हुँकरे टे कहाँ मोज भोज बाट खोजटि हेरठैं । काहे असिक बिगर गिलैं आझके युवा । आझके समाजमे कालु डंगौरा जसिन भलमन्सा ओ समाजसेवी बटैं टे गाउँ मजासे चलटिन तर कौनो गाउँमे गतिलो भलमन्सा नै हुइटिन टे उ गाउँके मनैनके बिच झगरा से लगाके कौनो सहयोग नै हुइटिन कना कहाइ इहे गाउँके अघरियाके कहाइ बटिन । एकठो सुन्दर गाउँ हो कैके टमान मनै कठैं टर कटरा मेहेनट ओ डुनियाँके बाट सुने परठ कना बाट सिर्फ कालु डंगौरा हुकिन किल पटा बटिन । उहाँके यि योगडान कौनो मनैं नै बसिरे सेकहि । आझ जैसिक अटरा समय होगिलिन हुँकाहार से ज्यादा किहु पत्ता नै हुइहिन । अपन गाउँके सहयोग टे करठ करठ औरे गाउँक मनैंफे सहयोग मंगठिन टे कबुफे नैकैके नैकठैं । उहाँ सायद अपनेहे छोटमे बाबा असिक करैलि टब्बे मनैनके सहयोग करेबेर पाछे नै हट्ना उहाँके बानी बटिन । अस्टे सेवा ओ सहयोगसे उहाँके गाउँ बनल बटिन । उहाँ एकठो असल ओ इमान्डार भलमन्साके रुपमे चिनैना मनै हुइँट् ।

शान्ती चौधरी

shantichy612@gmail.com