अँट्वारके अँट्वारी मनैना चलन

अँट्वारी टिहुवारके कथा महाभारतसे जुरल बा । अस्टिम्कीमे कन्हंैया भुमिका बा कलेसे अँट्वारीमे भेंवाँ (भिम) के । भेंवँक् जीवनी कथामे आधारित होके भेंवँक् करल कामके सम्झना कर्टि अँट्वारी टिहुवार मनाजाइठ । अँट्वारीमे ढेर मेरिक खैनापिना चिज बनाजाइठ् ओ अग्नि डेबहे चर्हाके मनाजाइठ् । ओहे खैना चिजसे अपन चेलीबेटिनहे अग्रासनके रुपमे डेजाइठ् । एक बरसमे एक चो किल असिके अपन चेलीबेटिन अग्रासन डेजाइठ् । असिके चेलीबेटिन अपन डाइबाबा डाडाभैया पाके खुसीके संगे लावा जिन्गि बिटल महसुस कैठंै । अँट्वारी टिहुवारमे जट्रा चिज बाँटबाँट खैबो ओटरे घरमे बरकट आइठ कना विश्वास बा । एक आपसमे पे्रमके गाँठ बलगर हुइठ् कना फेन विश्वास बा ।

अँट्वारीमे सेकठसम सक्कु घरमे लावालावा खैना परिकार बनैनामे लागल रठंै । मेरमेराइक परिकार बनाइक लाग कुछ दिन पहिलेसे सामा जुटाइ लगठैं । अँट्वारीमे पहिले अनिवार्य परिकार अन्डिक रोटी हो । अस्टके फुलौरी खँरिया, उरडक डाल, रामचानक डाल, चानक डालसे ओ साडा गोहँुक् पिठा, चौरक् पिठाके फेन बनाइ सेक्जाइठ् । अस्टेके फुलौरी फेन अनिवार्य रना परिकार हो । फुलौरी ढेर चिजके बनाइ सेकजाइठ् । मांसाहारी ओ साहाकारी डुनु मेराइक बनाइ सेक्जाइठ । पिठामे सिकार मिलाके, मच्छी मिलाके, पिठामे आँरा घिंघोरके फेन बनाइ सेक्जाइठ् । अस्टके मिर्चक् फुलौरी, आलुक्, गोभिक्, सागक, भाँटक, मेरमेराइक डाल मिलाके ढेर चिज फुलौरी बनाइ सेक्जाइठ् ।

अस्टके मेरमेराइक रोटी फेन बनाजाइठ् । टेलार, गुरी, नोनार, कोरु, लाल, काइल हरड्यार नम्मा, गुल्यार टिनकोन्ना । अस्टेके अन्डिक रोटी, चौरक रोटी, मैडक राटी, गोहँुक् रोटी, मकैक् रोटी, कोडोक् रोटी फेन बनाजाइठ् । अस्टके टिना टावनमे सिकार, मच्छी, घोंघी, सुटही, गेंटा ओ मेरमेराइक सागपाटके ढेर टिना बनाजाइठ् । पिना चिजमे सबसे ग्राहयटा डेजैना महुवँक डारु हो । जोन विरुवाके रुपमे फेन पिना जाइठ । अस्टके, मकैक् डारु, चाउरक् डारु, गोहँुक डारु, गिडारिक सिकारिके डारु जोन विरुवाके लाग बनाजाइठ् । भेली मिठाइक् डारु, कटहरके डारु, केरक् डारु फेन बनैना मनै बनैले रठैं ।

अँट्वारीमे तीनठो परिकारसे ढेर हुइ परठ । जे जट्रा सेकठ ओटरा सबके चाहना रठिन अपन चेलिबेटिन ढेर चिजके अग्रासन डेना । अगा्रसन डेहे जैबो टे अपन पहुनन्हे मजासे मान मरजाड करठैं । चेलिबेटिन अपन पहुनन्हे मट्वार कराके नैखवाइठ सम खवाइल हस नैलग्लक् मारे चेलीबेटी ओइने बहुट पहिलेसे पिवइना चिजके सामा करले रठैं । खेटी करे भेंवाँ सिखैलक ओरसे सक्कु चिज भेंवाँहे पुज्जाइठ् । अँट्वारी भेंवाँहे सम्झनामे मनाजैना टिहुवार हुइलेक मारे भेंवँक जिवनमे घटल घटनाके कथा सम्झटी भेंवक् पुजापाट कैजाइठ् । पाँच पन्डो मसे भेंवा (भिम) संन्झला हो । भेंवा बलके बरडान डेलक् ओरसे भैया भरिमसे बलगर रहिठ् । भेंवाँके बारेम कंचनपुर बेलौरीके हरिलाल लालडरिया सिरवार कठैं । भेंवा कैसिन ओ कट्रा बलगर रहे कना असिक जाने सेक्जाइठ् । पारबटुक एहर भेंवक् बाँढल भेंरुवा हो ओ बराबर खेटुवा हो । जब भेंवा खेटी करके धान काटल टे पुरुष मेचीसे पश्चिम महाकाली सम एक्के मुठा धान हुइल, टब सिरले यी एक्के मुठा धान केके खाइ कैह्के जराडेल उहे धान सौठियारी धान बनगैल । भेंवाँ भेंवँक कबु ५२ बखारिक धान एक्के चो खरिडके कबु एक्के मुठ्ठा । भेंवँक् छाटिक साइज ९ गज (मिटर) चाकर रहिन । भेंवाँ १२ बनवँक् अमरुट भठ्ठामे एक्के पाँजर टाँगके बोकडिंट ।

पाँच पान्डो बनबास गैलमे एक दिन भेंवाँ रोटी पकैटी पकैटी लराइ जैनास् लग्लिस् ओ रोटी अपन भैयन हेरे कहिके अप्ने लराइ गैगिलैं । एहोर रोटी पाक्के जरे लागल रहिन । चारु भैंया गल लगा लगाके रोटी बिलटैना कैसिस कर्लंै मने नैसेक्लैं । भेंवा आइलंै टे रोटी जरट रहिन । भेंवाँ अपन भैयन गर्याइ लग्लैं टुरहिन रोटी हेरे कले रहुँ खैबिल्टैलो । सब भैया कलैं हमे्र गल लगा लगाके बिल्टैली मने नैसेक्ली । भेंवा उ रोटी कानी अंग्रीले फटसे बिल्टा डेलैं । यीहे कहानीमे अँट्वारी टिहुवार मनाजाइठ् ओ एक्के कोरे पकाइल पहिलेक रोटी भेंवाँहे पुज्जाइठ् । जिहिहे अँट्वारीक् फरहार कैजाइठ् ओ काहारल टिना खँरिया, फुलौरी, रोटी पुरी अपन चेलीबेटिन अग्रासनके रुपमे डेहे जैना चलन फेन बा ।
संगम चौधरी