आगीक् व्यवस्थापन कर्ना तरिका

आगीके खोज मानव ओइनके लाग महत्वपुर्ण हो । एकर अन्डाज यिहे बाटसे लगाइ सेक्जाइठ् कि आझ जोन मनै भात पकाके खाइटंै यि सक्कु आगीक् कारण हो । हमार रोजके कामहे सजिल आउर हमार जिन्गीहे सहज बनाइक लाग आगीके महत्वपुर्ण भुमिका बा ।

आगीके खोजसे मानव ओइनके विकाससे सम्बन्ध जुरल बा । आझ मानव ओइनके जोन विकसित रुप बटिन् । उ एकठो लम्मा यात्राके परिणाम हुइटिन् । पहिले पहिले मनै जंगलमे रहिंट । ओइनकेठे कौनोफें साधान नैरहिन् । जेकर माध्यमसे ओइनके जिन्गिफें ओट्रा आरामडायिक नैरहिन् । असिन अवस्थामे मनै ओइनके अपन आवश्यकता अपनहे कैसिक पुरा करेसेक्जाइ कना विचारसे मनै अपनहे साधन जुटाइ लग्नैं । जंगलमे रहलेक ओरसे सक्कु मनैं जट्राफें रुखवामे मिल्ना फलमे निर्भर रहिंट । अस्टे समय संगे ढिरेढिरे जानबरिनके सिकार करे फेन सिकगैलंै । जंगली जानबर ओइनके सिकार कैके अपन जिन्गि चलैना हुइलेक ओरसे आगीके खोज करे लग्नंै । हम्रे हेरेसेक्ठी आगीके उत्पति कोन कालमे हुइल कना बाट यि मेर बा ।

पहिलेक मनैं ओइनके कहाइ अनुसार पहिले पहिले मनै भारी भारी चट्टान लैजाइ बेला डुइठो चट्टान टकराके ओमनेसे आगीक् चिट्गिन निकरल हुइटे ओहे डेखके औरे मनै ओइने अचम्म हुइनंै । ओइनफें कसिके चिट्गिन निकल हुइ कना साेंचसे ओइने अपनहे करके हेरलैं । पहिलेक मनैन बहुट कर्रा रहिन जंगलके बाघ, भालु, सेर, हाँठी जसिन जानबरिनके डर रहिन् । जंगली जानबर ओइनसे बँचेक लाग आगीके प्रयोग करिंट ।

ढिरेढिरे सर्डीके मौसममे, आगी, टुफान आइल बेला कुछ राहट पाइक लागफें आगीक् प्रयोग करे सिकगैलैं । टबसे आगीके आविष्कार हुइल हो । आगीके सहि तरिकासे सदुपयोग नैकरठी कलेसे यि मनैन भारी नोक्सानफें करेसेकठ् । आगी नैरहठ् कलेसे हमार पुर्खा ओइनके जस्टेके जंगलमे मिल्ना फल खाइ पर्ना रहे । आगीके आविष्कार हुइल संगे एकर व्यवस्थापनफे करे पर्ना हो । हमार पुर्खा ओइनके कहाइ बटिन अग्नी जल, वायुके संगे मानव जाति ओइने खेल्वार नैकर्ना हो । हम्रे टमान जसिन ठाउँमे डेख्ठी आगी लाग्के नोक्सान हुइल ।

पहिलेक मनै आगीके प्रयोगसे भात, टिना पकाजाइठ । मने गाउँघर ओहाेंर अभिनफें आगीसे भात, पकाइठ बिल्गाइठ । आगीमे पकाइल भात बरा मिठ लागठ् । हमार आजीआजा ओइने आगीमे पकाइल भात खैना किल रुचाइठ् । समयके संगे मनैफें टमान चिजके विकास करले बटैं । आगीहे व्यवस्थित करेक लाग ग्यास सिलिन्डरके प्रयोग करठैं । आझ हेर्ठी कलेसे टेक्नीक अट्रा आघे आगैल बा बिज्लीक पावरसे भात पकाइ लग्नैं । टमान जसिन ठाउँमे आगीसे दुर्घटना हुइल गाउँ घर ओर सुनमिलठ् । जोन हमार लाग बहुट खटरा बा । आगी व्यवस्थापन सरकार टे करि मने एकर व्यवस्थापन कर्ना हमार सक्कु जहनके दायित्व हो ।
शान्ती चौधरी