घोंघी थारु जातिनके टमान टिनाके परिकार मध्य घोंघीफें एक हो । घोंघी प्राय जसिन थारु समुदायमे खैना चलन बा । पहिलेक मनै पहिले मास मच्छी खाँइट् । घोंघी पानीमे मिल्ना जात हुइँट् । घोंघी टिना औरे टिनासे मिठ मान्जाइठ । एमने प्रोटीनके मात्रामे मिलठ् ।
हमार थारु समुदायमे घोंघीक् अपन महत्व बटिस् । थारु समुदायमे  घोंघी स्वास्थ्यके लागफें मजा रहठ कैके स्वास्थ्य जानकार लोग बटैठैं । पहिलेक मनै टिना नैमिले लागिन टे मच्छी मारे जिना ओ मच्छी घोंघी डुनु नानिंट ।

थारु समुदायमे  किल नैहोके आझ सक्कु समुदायके मनै घोंघी खाइ भिरल बटैं । मनो आझ आके सक्कु समुदायके मनैं घोंघी खैठैं । घोंघी आझ थारु समुदायमे किल सिमित नैहोके यिहि व्यापार ओ व्यावसायके रुपमेफें मजा व्यावसाय करटैं । एकर व्यावसाय कैके टमान मनै स्वरोजगार हुइल बटैं । घोंघी खाइक लाग डुरडुरसे मनै अइठैं । घोंघी छोट कटेजसे लेके भारीभारी होटेलमेफें घोंघी पाइसेक्ठी । एकर व्यावसाय पुरा बजारमे मजा चल्टिस् । घोंघी विशेष कैके टिबि रोगके लाग मजा डवाइके काम करठ कना बुझाइ बा ।

घोंघी निह्ना तरिका
घोंघी सामान्य तया खोल्वा ओ लडियामे मिलठ । अझकल घोंघी बहुट कम मिलठ । घोंघी हम्रे हमार लगाइल धान मनफें पाइ सेक्ठी । घोंघी बिनके लन्टी किल नैखैठैं । घोंघीहे मजासे सफा पानीसे ढोके भारी बटलामे पिठा डारके ओ खुडि डारके हुकनके चारा खवाके हुकन एक रातभर ओस्टे पानीमे भिजाके ढर्ना । डोसर दिन उहिन निकारके मजासे सफा पानीसे ४–५ चो ढोइना । टेलमे मजासे फराइ कैके मसला सक्कु डारके मजासे पाकेडेना । २० मिनेटसे २५ मिनेटसम पाकल घोंघी तयार होजाइठ । अझकल घोंघी हेरैटी जाइटा टमान मनंै एकर प्रयोग करे लागल बटैं । अझकल के थारु, के बाहुन, के क्षेत्री सबजे घोंघी खैठैं । पहिलेक मनै मिझनी खाइबेर जाँरसंग गँठठ् कहैं । एकचो जाँर पिके घोंघी स्वारसे सुरकलेसे बरा मिठ लागठ कठैं ।